Job 34

1Wasesithi u-Elihu:

2“Zwanini amazwi ami, lina madoda ahlakaniphileyo; lalelani kimi, lina madoda ayizifundiswa.

3Phela indlebe iyawahlola amazwi njengolimi lunambitha ukudla.

4Asizihluzeleni thina okulungileyo; kasifundeni ndawonye okuhle.

5“UJobe uthi, ‘Kangilacala, kodwa uNkulunkulu kangahluleli kuhle.

6Loba mina ngiqondile, kuthiwa ngilamanga; loba ngingelacala, umtshoko wakhe ungihlaba isilonda esingelaphekiyo.’

7UJobe kanti ungumuntu bani, onatha ukuklolodela njengamanzi?

8Uzwanana labantu abayizigangi; uhambisana labantu ababi.

9Ngokuba uthi, ‘Umuntu kakumsizi ngalutho nxa ezama ukuthokozisa uNkulunkulu.’

10“Ngakho lalelani kimi lina madoda azwisisayo. Kakube khatshana laye uNkulunkulu ukwenza ububi, khatshana kukaSomandla ukona.

11Uyamphindisela umuntu ngalokho akwenzileyo; umehlisela lokho okufanele ukuziphatha kwakhe.

12Kakungeni engqondweni ukuthi uNkulunkulu angenza ububi, ukuthi uSomandla angakutshila ukwahlulela kuhle.

13Ngubani owambekayo phezu komhlaba na? Ngubani owathi kalawule umhlaba wonke na?

14Aluba wayengathanda asuse umoya wakhe lokuphefumula,

15bonke abantu babengatshabalala kanyekanye, umuntu wayezabuyela othulini.

16“Aluba lilokuzwisisa, zwanini lokhu; lalelani lokhu engikutshoyo.

17Kambe lowo ozonda ukwahlulela kuhle angabusa na? Liyamlahla yini Yena oqotho njalo olamandla?

18Kakunguye yini othi emakhosini, ‘Kalisizi lutho,’ athi kwabayizikhulu, ‘Libabi,’

19ongatshengisi ukwazisa amakhosana kulabanye loba athande abanothileyo kulabayanga, ngoba bonke bangumsebenzi wezandla zakhe?

20Bayafa nje masinyane, loba phakathi kobusuku; abantu bayanyikinywa bedlule; abalamandla bayasuswa kungelasandla somuntu.

21“Amehlo akhe aphezu kwezindlela zabantu; ubona zonke izinyathelo zabo.

22Akulandawo emnyama njani lathunzi elisithe njani, lapho abenzi bobubi abangacatsha khona.

23UNkulunkulu kasweli ukuthi aphinde abahlolisise abantu, ukuze abalethe ekwahlulelweni phambi kwakhe.

24Engaqalanga wahlola uyabaphahlaza abalamndla abeke abanye endaweni yabo.

25Ngokuba ezinanzelela izenzo zabo, uyabagenqula ebusuku bahlifizeke.

26Uyabajezisa ngenxa yobubi babo kube sendaweni ebonwa ngumuntu wonke,

27ngokuba baphambuka ekumlandeleni abaze banaka layiphi indlela yakhe.

28Benza ukukhala kwabayanga kweza phambi kwakhe, laye wakuzwa ukukhala kwabasweleyo.

29Kodwa nxa elokhu ezithulele, ngubani ongamsola na? Angafihla ubuso bakhe ngubani ongambona na? Kanti uphezu komuntu lesizwe ngokufanayo,

30ukwalela ongelankulunkulu ukuthi abuse, ukuze angafakeli abantu izithiyo.

31“Ake sithi umuntu athi kuNkulunkulu, ‘Ngilecala kodwa kangisayikona njalo.

32Ngifundisa lokho engingakuboniyo; aluba ngenzile okubi, kangisayikuphinda ngikwenze.’

33Pho uNkulunkulu akuvuze ngokwentando yakho na, wena usala ukuphenduka? Kumele ukhethe wena, hatshi mina; ngakho ngitshela lokho okwaziyo.

34“Amadoda alokuqedisisa azakutsho, amadoda ahlakaniphileyo abangizwayo ngisithi kini,

35‘UJobe ukhuluma engelalwazi; amazwi akhe kawalambono.’

36Hawu, uJobe engasake alingwe ngokweqileyo ngoba ephendule njengomuntu omubi!

37Phezu kwesono sakhe wengeza ukuhlamuka; uyakloloda ngokuqakeza izandla zakhe phakathi kwethu andise amazwi akhe aphikisa uNkulunkulu.